شاورما زي بتاعت المطاعم .

المكونات :

فخدة ضاني او نيفة ( مش بقري خالص )

ربع كوب خل أو أربع معالق اكل

2 ليمونة متوسطة

ملح- فلفل اسود- بهارات (عادية و سبايسي)

بصل شرائح رفيعة حوالي 2 بصلة كبيرة

طماطم شرائح رفيعة حوالي 1 كبيرة

بقدونس مفروم و الكمية على حسب الرغبة

سلطة طحينة



الطريقة :

الفخدة تخلي الجزار يخليلك منها العظم و يقطعها شرائح مثل البانيه بسمك رفيع حوالي 2/1 سم ( ماتنسيش تاخدي العظم متكسر لتلاتة عشان ممكن تعمليهم شوربة مع الفتة بتبقى حلوة أوي )

تغسلي اللحمة و تسيبيها تتصفى من المية كويس و بعدين تحطي عليها الخل و الليمون و الملح و الفلفل الأسود و البهارات ( بحط بهارات كتير )

تقلبيها كويس و تشيليها في التلاجة لحد تاني يوم


نيجي بقى للتسوية ...
هنسويها ازاي يا حلوين

















عارفة شبكة الشوي اللي ليها شبكتين بيتقفلو على بعض( هحاول انزل صورتها بس هي معروفة يعني )
ترصي فيها اللحمة مفرودة كويس و تقفليها

فرن البوتاجاز بيبقى فيه رف شبكة ... تشيلي الصاجة اللي فوق النار بتاعت الفرن و تحطي الرف الشبكة في أول مجرى ليه من تحت فوق النار
و تشغلي النار على الحرارة اللي انت عاوزاها و يفضل 200 و تسيبي الفرن يسخن أوي

تحطي شبكة اللحمة على الرف الشبكة في الفرن و هتسيبي الفرن مفتوح و تفضلي بقى تقلبي من وش للتاني لحد ما تستوي و تتحمر شوية بس خلي بالك عشان ما تنشفش

و تفضلي بقى تكرري لحد الكمية ما تخلص

بعد ما تسوي اللحمة كلها تقطعيها شرايح رفيعة و هي سخنة كده و تحطيلها البصل و الطماطم و البقدونس و تحطيها في السندويتشات و عليها الطحينة

و ممممممممممممممممممممم بالهنا و الشفا

تسلم الايادى

تسلمين